| S1249 | 7365.55 Index schepenprotocol Oss (7365.55) Samenvatting op bhic.nl: Claes Michiels, Cornelis van Oss, Jan Peeter Smits, Aert Peeter Thonissen, Peeter Janss ende Jan Reijnders, schepenen, Anthonis Huijberts ende Jan Lamberts borgemeesteren van Oss, Daniel Jan Rijcken, Jan Peeters van Heeswijck, Jan Rovers, Willem Peeterss van Osch, geswooren, Nijcolas van Oss ende Gerit Jacops sVorsters kerckmeesteren, Anthonis Huijbertss voors heijlgeestmr. van weghen de vrijheijt van Oss ter eenre ende Gerit Jan Jacopss als man van Peeterken dochter Dierck Aelberts Smith ende Henrick Jan Roeffen als man van Jenneken dochtere Diercx voirs, Jan Meeus van Erp als man van [niet ingevuld] oock dochtere Dierck Aelberts voirs, geassisteert met Thonis Janss Corneliss, ende hen sterck maeckende voir Jan Dierck Aelbertss ter andere sijden; hebben geaccordeert met malcanderen aengaende seeckere vrijdom van contributien der goederen wijlen Dierck Aelberts bijden selven Diercken den Smith tanden tijden teghen de schepenen, borgemeesteren ende andere regheerderen der voirs vrijheijt gecoft voir de somme van 200 gulden ende noch voir de somme van 45 gulden vande regheerderen der voirs vrijheijt een stuck lants buijten het claphecken geleghen ende den heijlighengeest tot Os toebehoorende, bijden selven Dericken Aelberts beleendt; sijn de voirs parthijen veraccordeert, te weetene dat die schepenen, borgemeesteren ende regheerderen der voirs vrijheijt inden naeme van den selve vrijheijt inne volle voldoeninghe vande voirs sommen op bamis dach toecoemende sullen betaelen de somme van 195 gulden ende boven dijen de goederen Dierck Aelberts voirs tot bamisse toe incluijs sullen vrij ende exempt wesen inde vaetsaet ceelen ende het merghengelt, wel verstaende nochtans dat de selve erffgenamen het koijgelt oft schaergelt schuldich sullen wesen te betaelen. Met welcken voirs accorde sullen gedoleert sijn alle de voirgaende gesette contributien ende cedullen, geset op de onvrij ende naegecofte goederen des voirs Diercx Aelberts als te weetene de goedern nae de vrijdom van contributie gecoft. Mits hier inne oock geconditioneert dat inne soe verre de voirs 195 gulden voors op bamissdach toecoemende nijet en wordden betaelt, sullen die voirs erffgenamen Dierck Aelberts soe langhe vrij sijn van de goederen Diercx voirs tot dat de penninghen voors sullen wesen betaelt, behoudelijck nochtans dat de voirs erffgenamen Dierck Aelberts vande voirs 195 gulden altijt sullen moegen eijschen betaelinghe aende voirs gelooveren, regheerderen der vrijheijt van Oss, op bamisdach toecoemende ende soe voorts aen. Actum den 6-14-1604, presentibus scabini ut supra. |